Δίστιχα...

Dimitris Kotyletes Kehagias :

"Να σαν εσένα Χουπερήν, ζαερ πως ατλαεύω

σο κάστρον τη Γαράσαρης κάθουμαι κι οφλαεύω..."

Houperin Asarcikli :

"Απάν' ασήν Γαρέσαρην, αμον αητέντς πετάγω, 

ιβόρα εφτάγω σο Εγριπέλ και σα Κοτύλε πάγω..."

Dimitris Kotyletes Kehagias :

"Ασά Κοτύλεα έρχουμαι, σο Ασαρτζούχ να πάω...

τ'ομμάτεα μ' είδαν το Γουρούχ, τρανόν όρκον εφτάω..."

Houperin Asarcikli :

"Ασό Γουρούχ σο Τάμντερε κι επ'έκει σ' Ασαρτζούγουν, 

λούρα ζουρνά επαίρουνε και τα ταβούλια κρούγουν..."

Dimitris Kotyletes Kehagias :

"Σίτεα δεαβαίνω τ΄ Ασαρτζούχ δάκρεα πονέα γεράδες 

τα τέρτεα μ΄ επερίσσεψαν ση Τάμζαρας τ΄ οβάδες..."

Houperin Asarcikli :

"Σίτε αφκά ασ' Ασαρτζούχ, τη Καταχώρ ρασία, 

εκεί τρώγνε και πίνουνε τη Λίτζασας παιδία..."

Dimitris Kotyletes Kehagias :

"Λέγνε για τη Γαράσαρη ντο εν όλο σκοτία, 

σ'εμά τ' ομμάτεα φαίνεται τρανέσα πολιτεία..."

Houperin Asarcikli :

"Σκοτία εν' τ'ομμάτεα'τουν, αβούτ' τιδέν 'κί ξέρ'νε, 

τ'εμέτερα τα κάστροπα, των Ακριτών τα τέρτεα λέγ'νε..."

Dimitris Kotyletes Kehagias :

"Εκιτι πάσα Χουπερήν τα ψύας όλο κλαίγνε 

σίτεα ελέπς Γαρασαρη τ' ομμάτεα σ΄ αραεύνε..."

Houperin Asarcikli :

"Εσύ πα πάσα-Κεχαγιά, ασά Κοτύλε ρίζας έσεις, 

τα λεφτοκάρεα σο ρασίν παγαίνεις να τερέσεις..."

Dimitris Kotyletes Kehagias :

"Εσύ ελέπς το δεάταγμαν, ατό τη σκευοφύλαξ, 

να ξερτς τρανόν η φάμελια ση Κεχαγιά το κρίμαν..."

Houperin Asarcikli :

"Τρανόν κιτάπ εφτάγουνε, όλια τ`εμά τα σόγια, 

Νικόπολις και Κερασούς σον ουρανόν έχ'νε τα μπόγια..."

Dimitris Kotyletes Kehagias :

"Λελεύω σε Γαράσαρη, σα λίβεα απές πως κεισαι,

σο κάστρο σ' ετσαντζάρεψα, ο Χουπερήν τερεί σε..."

Houperin Asarcikli :

"Ατά ντο λέγεις Κεχαγιά, εν' τραγωδία σ` ωτία μ', 

σο κάστρον γυροκλώσκουμαι, 'λαρώνετ' η καρδία μ'..."

Dimitris Kotyletes Kehagias :

"Πολλά νουνίζεις με τ'αχούλ, πολλά με την καρδίαν,

τ'ομμάτεα σ' εσκοτείνεψαν ασήν αρρωθυμίαν..."

Houperin Asarcikli :

"Τ' ομμάτεα μ' εν' σο Ασαρτζούχ, σην καστροπολιτείαν,

σίτε ακούγω τον ζουρνάν, χουλαίνετ' η καρδία μ'..."

Dimitris Kotyletes Kehagias :

"Η κάρδεα σ' έν σο Ασαρτζούχ και ση Βελή τ' οσπίτ' ε',

το ψυοόπο σ' έν αβόλιστον, καμίαν 'κί θα κείται..."

Houperin Asarcikli :

"Ατό τ'οσπίτ 'κι'έν τη Τουρκάντ', εν' τη Τζανών Πετράντων,

δάκρεα και γαίμα έχ' απές, Ρωμαίων Ακριτάντων..."

Dimitris Kotyletes Kehagias :

"Χιλιάδες χρόνεα εδέβανε, Τζανών Πετράντων γαίμαν,

ακόμαν γυροκλώσκουνταν Πετράντ' αφκά σο ρέμαν..."

Houperin Asarcikli :

"Εμείς κι αν αποθάνουμεν, το όνομαν κι αν χάται,

κάθε λιθάρ' θα λέγ'ατό, Ρωμαίοις θα λογιάται..."

Dimitris Kotyletes Kehagias :

"Τον θάνατον ξαν μη νουνίζ'ς, γιοσμάς είσαι ακόμαν.

Ρωμαίοι έρθαν κι εδέβανε, θάμαν σ' ατό το χώμαν..."

Houperin Asarcikli :

"Γαρεσαρέτες σκύλ' υιός είμαι, τον Χάρον 'κί φοβούμαι,

το γαίμα το ρωμαίικον για πάντα θα κρατούμε..."

Dimitris Kotyletes Kehagias :

"Λίτζασα, Τάμζαρα, Κοϊνίκ και ούλεα τα χωρία,

με τ'εσέν σίτεα είδα'τα, κ' ανασπαλλω καμίαν..."

Houperin Asarcikli :

"Τα μέρια τη Γαρέσαρης, 'κί ίνεται να ανασπάλλεις,

μίαν ελέπ'ς ασά σουμά, σο νού'σ απές τα βάλεις..."

Dimitris Kotyletes Kehagias :

"Έκιτι πάσεα Ασαρτσικλή, τα λόγεα σ' έν βαρέα,

μίαν κι άλλο ας επέγναμε, εντάμα με παρέα..."

Houperin Asarcikli :

"Ο Θεόν εν' με τ'εμάς, με τη Ρωμαίοις εντάμαν,

πάλε θα φτάει το θάμαν'ατ, για το τ'εμόν το τάμαν..."